Chapitro XXVII

Granda disputo inter Pinochio e lua kompani; konseque kompano vundesas, e la jendarmi arestas Pinochio.

Apene Pinochio arivis a la plajo lu atence regardis a la maro, ma lu vidis nula Sharko. La maro-surfaco esis tante plata kam vitra spegulo.

-Ube esas Sharko ? -questionis dum ke lu turnis su a lua kamaradi-.

-Forsan lu iris serchar manjajo -respondis ridanta kompano-.

-O forsan lu kushis su sur lua lito por kelke dormar -dicis altra kompano qua rideskis plu forte kam la antea mokemo-.

Ta ne kongruanta respondi e stulta ridi komprenigis da Pinochio ke lua kompani mokabas lu, pro kredigar a lu mentiajo; lore lu iraceskis e dicis a li:

-Bone ! Kad amuzas vi kredigar a me la falsajo pri Sharko ?

-Certe lo esas amuziva ! -respondis samatempe la raskali-.

-Pro quo amuziva ?

-Pro ke ni impedis a vu asistar la skolo e vu venis kun ni. Ka vu ne shamas pri vua akurata asisto singladiala a skolo e pri sempre savar la lecioni ? Ka vu ne shamas pri tante multe studiar ?

-Se me studias o me ne studias to ne importas a vi.

-Tote kontree lo importas a ni maxim multe, nam vua studiemeso ridindigas ni koram la skolestro...

-Pro quo ?

-Pro ke la studiema skolani sempre minvalorigas ti qui nulatempe volas studiar, to esas, ni. E ni ne volas esar desestimata da la skolestro. Anke ni esas estiminda !

-Do, quon me devas agar por felicigar vi ?

-Devas esar tedanta a vu la skolo, la lecioni e la skolestro, to esas, nia tri maxim importanta enemiki.

-E quo eventus se me duras esar studiema ?

-Ni ne plus atencos vu, e ni punisos vu pro la ofenso.

-Vere lo ridigas me -dicis la pupeo dum ke lu gratis lua kapo-.

-He ! Pinochio ! -klamis la maxim granda puero dum ke lu fixigis lua regardo a la pupeo-. Ne vu esez brava nek superba ! Se vu ne timas ni anke ni ne timas vu ! Ne vu obliviez ke vu esas sola e ni esas sep pueri !

-Sep, quale la morto-peki ! -dicis Pinochio qua samatempe maxim laute rideskis.

-Ka vi audis to ? Lu insultis ni omna ! Lu komparis ni kun la morto-peki !

-Pinochio ! Pregez pardono a ni... altrakaze...

-Ku-ku ! kantis la pupeo tushanta la extremajo di lua nazo burleske.

-Pinochio ! To ne bone finos !

-Ku-ku !

-Vu frapesos da ni plu multe kam asno.

-Ku-ku !

-Vu retroiros adheme kun vua nazo ruptita !

-Ku-ku !

-Nun me donos a vu "ku-ku" ! -klamis la maxim audacanta raskalo. Yen frapo a vu, olquan vu povos gardar til la supeo !

E lu pugno-frapis la kapo di Pinochio.

Ma pos unesma frapo sempre venas duesma. Nemediate la pupeo pugno-frapis la frapinta puero e komprenende subite omni partoprenis en furioza kombato.

Malgre ke Pinochio esis sola lu defensis su quale heroo. Per lua tre harda ligna pedi tante forte pedo-frapis la raskali ke li ne audacis proximigar su a la pupeo. Ye la loko ube la pedo di Pinochio frapis ulu aparis nemediate violea lezuro duriva.

Lore la pueri, iracigita pro ne povir sendanjere proximigar su a Pinochio, desligis la rimeni qui ligis kune la libri di singla skolano e lanseskis a lu, silabari, gramatiki, rakonti, lekto-libri, ed altra skolala libri; ma pro la ajileso ed ecelanta vido di la pupeo, lu facile eludis la fluganta libri olqui fine falis aden la maro.

Quon agis la fishi ? pro ke la fishi supozis ke la libri esis manjebla, li natis maxim rapide proxim la maro-surfaco a ta libri intence devorar oli, ma la saporo di la papero-folii e di la libri-kovrili esis tante desagreabla a la fishi ke li nemediate sputis la paperaji mordita. La tordita gesto di lia vizaji savigis ke li kustumale manjas nutrivi plu saporoza.

La feroceso di la batalio sencese plugrandeskis. Subite kankro ekiris la maro e lente marcheskis adsur la sablo di la plajo. Lu klamis per sonorozega voco pro katareto:

-Haltigez la batalio, raskali ! la disputi inter pueri nulatempe bone finas ! Sempre ula desagreablajo eventas !

Povra kankro ! Lua parolado esis tam sucesoza ye la skopo haltigar la batalio kam parolar a nulu en dezerto. Pluse la iracigita pupeo turnis lua kapo a la kankro e maxim grosiere dicis:

-Tacez, odiinda kankro ! Vu sugez du piluli por kuracar vua katareto. Enirez vua lito ed ibe sudorifez !

Dume la pueri ja lansis omna lia libri a Pinochio, ma li vidis la kunligita libri di Pinochio e nemediate prenis oli.

Inter ta libri esis "Traktato pri Aritmetiko". Olu esis tre grosa e pezoza libro, kun harda kovrili ek densa kartono.

Raskalo prenis ta libro e per la maxim granda forco di lua brakio lansis olu a Pinochio; ma vice frapar la kapo di Pinochio la libro frapis la kapo di kompano di la lansero. Subite la frapito paleskis e la koloro di lua vizajo divenis tam blanka kam papero-folio, e lu nur povis dicar ta poka vorti:

-Matro mea, helpez me... nam me morteskas !

E lu falis tote extensita a la sablo di la plajo. Lua mortinta aspekto tre multe pavorigis lua kompani, e fugigis li. Pos poka sekundi nula kompano esis kun la jacanta frapito.

Ma Pinochio ne abandonis lu, malgre ke anke lu esis preske mortinta pro la pavoro. La pupeo humidigis per maro-aquo lua nazo-tuko, olquan lu uzis por humidigar la tempori di la povra skolo-kompano. Dume Pinochio sencese ploris tote desesperita, e dicis a la puero:

-Eugenio !... Kompatinda Eugenio... Apertez vua okuli e regardez me !... Pro quo vu ne plus respondas ?... Me ne esas kulpanta, ka vu savas to ?... Me ne frapis vu... Kredez mea vorti !... Apertez la okuli, Eugenio !... Se vu ne plus apertas la okuli lore anke me ipsa mortos... Mea Deo !... Quale nun me povos irar a mea hemo ?... Quon dicos a me mea matro ?... Quo eventos a me ?... Adube me iros ?... Ube me povos trovar celeyo ?... Certe esabus preferinda asistir la skolo ! Pro quo me obediis mea kompani ? La skolestro avertis me pri... e mea matro dicis a me plurafoye: "Atencez ne amikigor mala kompani". Ma me esas tante desobediema... ed obstinema... Me askoltas la bona konsili ma pose me agas segun mea volo ! Do pose me devas pagar mea erori... Yen pro quo de mea nasko me nulatempe juis mem un horo tranquila ! Mea Deo ! Quo eventos a me ? Quo eventos a me ? Quo eventos a me ?...

Pinochio duris la plorado e lamentado, pluse lu pugno-frapeskis sua kapo, sen cesar lua advokado a la jacanta Eugenio per ilua nomo. Subite lu audis bruiso da proximiganta pazi.

Lu turnis lua kapo a la bruiso-origino: du jendarmi proximigis su a la pupeo.

-Quon vu facas hike, jacanta sur la sulo ?

-Me flegas ta skolo-kompano.

-Ka lu male standas ?

-Semblas a me ke yes...

-Lu tre male standas ! -dicis jendarmo qua inklinis su a la puero por bone observar lu-. Ta puero frapesis adsur lua temporo. Qua frapis lu ?

-Me ne frapis lu -balbutis la pupeo, sen forco por pluse parolar-.

-Se vu ne frapis lu, qua vundis lu ?

-Me ne frapis lu -itere dicis Pinochio.

-Quon onu uzis por frapar lu ?

-Per ta libro.

E la pupeo rekoliis de la sulo la libro "Traktato pri Aritmetiko", di qua kovrili esas ek densa kartono, por montrar olu a la jendarmo.

-Qua esas la proprietanto de ta libro ?

-Me.

-To suficas, onu ne pluse devas savar. Stacez e venez kun ni.

-Ma me...

-Vu venez kun ni !

-Ma me esas inocenta...

-Vu venez kun ni !

Ante la departo, la jendarmi advokis peskisti qui pasis en lia kanoto proxim la plajo e dicis a li:

-Ni konfidas a vi ta puero vundita. Portez lu a lua domo e flegez lu. Morge ni iros vidar lu.

Pose la jendarmi situis Pinochio inter li, ed imperis per militala voco a lu:

-Adavane, e marchez kun rapideso ! Altrakaze vu repentos ne obediir ni !

Sen plusa imperi, la pupeo marcheskis adsur la voyo a la vilajo. Ma la povra kerlo ne savis vere ube lu esis. Lu kredis ke to omno esis desagreabla sonjo. Fakte lu foleskis. Lua okuli vidis omno duopligita, lia gambi tremeskis, lua lango esis glutinita kun lua palato do lu povis dicar nula vorto. Tamen, meze ta konfuza stando, to quo maxim multe dolorigis lua kordio esis savar ke lu pasos, kun la akompananta jendarmi, apud la fenestri di la domo di la bona Feino. Certe la morto esabus preferinda kam to !

Ante enirar la vilajo kapricoza vento-stroko desmetis la boneteto di Pinochio, e portis olu a loko distanta de li per deko de pazi.

-Ka vi permisas a me -dicis la pupeo a la jendarmi- rekoliar mea boneteto ?

-Rekoliez olu, ma retrovenez nemediate.

La pupeo iris a lua boneteto por rekoliar olu... ma vice metar olu sur lua kapo, lu sizis olu per lua denti e kureskis maxim rapide a la plajo. Lua rapideso esis tam granda kam ta di kuglo.

La jendarmi supozis ke li ne povus kaptar la kuranta pupeo, do li imperis a feroca hundo persequar e kaptar la pupeo. Ta hundo sempre ganis la maxim importanta premii en omna hundo-kuradi. Pinochio kuradis, ma la hundo kuradis plu rapide kam la pupeo. La vilajani observis de lia fenestri la kuranti intence savar la konkluzo di ta feroca kurado. Ma li ne povis vidar la kurado-konkluzo pro ke dum la kurado adsur la voyo, la pedi di Pinochio e di la hundo kreis polvo-nubo olqua celis la kuranti, qui do ne plus esis videbla.