Chapitro XXVI

Pinochio iras a la maro-bordo kun altra skolani por vidar la terorigiva Sharko.

Ye la sequanta dio Pinochio iris a la publika skolo. Vi imaginez la konduto di la pueraro lor la arivo aden la skolo de pupeo ! Li omna sencese ridis laute. Puero jokis kun lu, anke altra puero agis same, altra prenis lua boneteto, altra tiris de lua jaketo, altra intencis desegnar labiobarbo sur lua vizajo per farbokrayono, ed ulu intencis ligar lua pedi per kordi intence dansigar lu quale marioneto.

Dum ula tempo tranquila Pinochio permisis la joki da lua kompani, ma pro ke lua pacienteso exhausteskis lu dicis serioze a la maxim jokema e mokema:

-Bone, suficanta ! Me ne eniris ta skolo por esar via bufono ! Me respektas vi, do me volas ke vi respektez me !

-Bravo ! Vu parolis quale apertita libro ! -klamis la raskali qui rideskis plu forte kam antee; mem la maxim impertinenta raskalo intencis manuo-kaptar la extremajo di la nazo di la pupeo-.

Ma lu ne sucesis pro ke Pinochio extensis lua gambi sub la tablo e pedo-frapis la gambo di la raskalo.

-Aye ! Quante harda esas vua pedi ! -klamis la raskalo dum ke lu manuofricionis la vunduro-.

-Ed anke lua kudi !... plu harda kam lua pedi ! -dicis altra raskalo qua meritis e ganis kudo-frapo da Pinochio sur lua ventro.

Lor la frapi da Pinochio, la pupeo ganis la estimo e respekto de la cetera skolani, omni karezis e respektis lu maxim multe.

Anke la skolestro esis tre kontenta pro ke Pinochio esis studiema, inteligenta, e sempre lu esis la unesma lernanto qua eniris singladie la skolo e la lasta lernanto qua ekiris la skolo lor la fino di la lecioni.

La unika defekto di Pinochio esis ke lu tro multe prizis esar kun ula kompani, qui esis raskali tre konocata da omni pro lia poka amo a la studio ed a la bona konduto.

Singladie la skolomastro avertis Pinochio pri ta kompani, pluse la bona Feino plurafoye dicis a lu:

-Kara Pinochio, atencez ke vua skolo-kompani ne desaparigos vua amo a la studio, forsan li adportos a vu ula malajo.

-Esas nula danjero tarelate ! -respondis la pupeo levante lua shultri e tushante sua fronto per extensita indexo por mimale dicar: "Esas tre multa sajeso interne".

Ye ula dio, dum la marchado a la skolo, Pinochio trovis survoye grupeto de la konocata raskali, qui iris a lu e dicis:

-Ka vu savas la granda novajo ?

-No.

-Jus arivis, a la proxima maro, Sharkon tam granda kam monto.

-Ka vere ? Kad olu esas la sama sharko qua esis en la maro kande mea patro dronesis ?

-Ni iras a la plajo por vidar olu. Ka vu venas kun ni ?

-No, me volas asistar la skolo.

-La skolo nun ne importas ! Morge ni iros a la skolo. Pro ne lernar un plusa leciono ni ne esos plu ignoranta kam antee.

-Quon dicos la skolomastro ?

-Lu dicez to quon lu dezirez dicar ! Onu pagas lua salario por ke lu grunez dum la tota jorno.

-Quon dicos mea matro ?

-La matri sempre savas nulo -respondis la raskali-.

-Ka vi savas quon me agos ? -dicis Pinochio- Me volas vidar la Sharko pro ula motivi... ma me iros a la plajo lor ekirar la skolo.

-Kompatinda stulto ! -respondis grupetano-. Ka vu supozas ke fisho tante granda restos tro longatempe en la sama loko til ke vu decidos irar adibe ? Kompreneble la tedeso igos olu departar ad altra maro.

-Quanta tempo duras la marchado a la plajo ? -questionis la pupeo-.

-Ye un horo pos nun ni itere esos hike.

-Do adavane ! Ta qua laste arivos a la plajo esas stulta ! -klamis Pinochio-.

Lor la krio da Pinochio lu e la raskali-grupeto kureskis tra la agri a la plajo, kun la libri e la kayeri sub lia brakii. Pinochio sempre kuris avan omni, quale se lu havus ali en lua pedi.

Dum la kurado ulafoye lu levis lua kapo addope por mokar lua persequanta kompani qui esis tote fatigita, anhelanta e desneta pro la voyo-polvo. To tre multe ridigis Pinochio.

La kompatinda pupeo nulo savis pri la futura desfeliceso olqua venos a lu !