Chapitro VI

Pinochio dormas apud la herdo. Ye la sequanta dio matine lor la vekigo, Pinochio konstatas ke lua pedi brulesis da la fairo dum la nokto.

Ta esis desagreabla nokto vintrala. La vetero esis terorigiva, la tondri esis surdiganta, la fulmini lumizis tante intense la cielo ke olu aspektis plena de fairo, la kolda e jenanta vento kreis polvo-nubi e violente movigis la arbori.

Pinochio timis la tondri e la fulmini, ma lu plu multe timis la hungro, do lu apertis la domo-pordo e per ula centi de salti lu arivis a la proxima vilajo. Lu arivis ibe tre fatigita, kun lua lango exter la boko, e lua respirado similesis a ta di chaso-hundo.

Omno esis obskura. Nulu esis surstrade. La pordi di la vendeyi esis klozita, la pordi di la domi esis klozita, la fenestri esis klozita e nulu esis surstrade. Ta vilajo aspektis la lando di mortinti.

Lore Pinochio, desesperita pro la hungro, plurafoye sonigis la klosheto di domo. "Ulu aparos ek la fenestro" supozis Pinochio. Certe oldulo, kun dormo-boneto, klamis iracigita :

-Quon vu deziras ye ta kloko di la nokto ?

-Voluntez donar a me pano !

-Vartez, me retrovenos balde -respondis la oldulo, qua supozis ke Pinochio esis malicajema puero, same kam ti qui amuzas su per sonigar klosheti dum la nokto por vekigar la dormanta personi.

Pos poka tempo, la oldulo itere apertis la fenestro di lua dormo-chambro e lu dicis a Pinochio :

-Stacez sub la fenestro e preparez vua chapelo.

Pinochio, qua ne havis chapelo, proximigis a la parieto sub la fenestro e granda aquo-siteledo falis adsur lu. Tote aquo-imbibita lu retroiris a lua domo. Pro la fatigeso e la hungro lua forci desaparis, do lu sideskis en benko apud la herdo e lu proximigis lua humidigita e fango-parkovrita pedi a la fairo. Balde lu dormeskis. Desfortunoze lua ligna pedi bruleskis, e pokope oli divenis cindri.

Dum la pedi-brulado, Pinochio profunde dormis e ronkis. Jorneske frapi adsur la domo-pordo vekigis la ligna pupeo.

-Qua esas vu ? -questionis Pinochio, ocitante e manuo-fricionante la okuli.

-Esas me -respondis voco.

Pinochio rikonocis la voco da Jepeto.