Chapitro V

Pinochio hungras, e dum la manjajo-serchado lu trovas ovo olquan lu intencas uzar por koquar omleto; ma surprizante ta omleto flugante eskapas ek la chambro tra la apertita fenestro.

Nokteskis, e Pinochio memoris ke lu nulon manjabis pro ke lua stomako tremeskis pro hungro. Ma la hungro di la pueri ne esas vartiva. Poka minuti pose, la hungro divenis ye granda hungro ed ula minuti pose la granda hungro divenis ye enorma hungro, tam granda kam ta di volfo.

La povra Pinochio proximigis su a la herdo, ube esis la marmito kontenanta boliajo, e lu intencis deskovrar ta marmito por vidar olua kontenajo, ma vi omna memoras ke la marmito esis pikturo sur la parieto. Imaginez la aspekto di lua vizajo pro la surprizo. Lua nazo, olqua ja esis longa, plulongigesis plu multe kam quar inchi.

Lore en la chambro, en omna tir-kesti ed en omna celeyi lu serchadis pano, mem sikigita pano, mikra pano-krusto, midevorita osto obliviita da hundo, fisho-spino, ulo manjebla. Ma lu trovis nula nutrivajo, nula.

Ma sencese la hungro kreskis, e por kalmigar olu Pinochio nur povis ocitar. Dum la ocitado, Pinochio enorme apertis lua boko, til lua oreli. Ma malgre la ociti la tremado di lua stomako ne cesis. Lore Pinochio ploreskis tote desesperita e lu dicis :

-La parolanta Grilio esis certa ! Me ne devis revoltar kontre mea patro ed eskapar ekheme... Se mea patro esus hike lore me ne ocitadus pro hungro. La hungro esas maladeso tante mala !

Subite, en rezidui-amaso, Pinochio vidis ulo sferatra e blanka, olqua samaspektis kam hanino-ovo. Pinochio nemediate saltis adsur olu. Certe olu esis ovo !

La enorma feliceso di Pinochio esas nedeskriptebla. La ligna pupeo tushis, karezis e kisis la ovo; samatempe lu dicis :

-Quale me koquos ta ovo ? Kad omleto ? Ka koquita en bolianta aquo ? Forsan fritita olu esos plu saporoza... No, la maniero maxim rapida esas koquar olu en bolianta aquo, me tre multe hungras !

Lore Pinochio pozis marmito kontenanta aquo adsur furnelo. Kande la aquo bolieskis lore Pinochio ruptis la ovo-shelo intence jetar olua internajo aden la marmito. Ma surprizante de la ovo ekiris uceleto, qua tre gaye e polite reverencis a Pinochio e dicis a lu :

-Me dankas a vu la shelo-rupto ! Salutez vua familiani ed esez felica ! Adio !

E la uceleto flugeskis ed ekiris la chambro tra la apertita fenestro.

La povra pupeo stacis senmova, kun la regardo a la fenestro, la boko tote apertita e la du mi-sheli di la ovo en lua manui. Kande lu kompreneskis to quo jus eventis lore lu ploreskis, krieskis e pedo-frapeskis la sulo, tote desesperita, dum ke lu dicis :

-La parolanta Grilio esis certa ! Se me ne skapabus ek mea hemo, e se mea patro esus hike kun me, lore me ne mortus pro hungro ! La hungro esas maladeso tante mala !

Pro ke la tremado di lua stomako pro hungro evidente ne cesis, e lu ne savis quale agar por kalmigar olu, lore lu ekiris lua domo por irar a proxima vilajo e mendikar pano.