Chapitro III

Itere en lua hemo, Jepeto talieskas la ligna bloko por krear la pupeo e decidas nomizar olu Pinochio. Unesma malicaji da la pupeo.

La hemo di Jepeto havis nur surtera etajo, qua lumizesis da la suno-lumo tra ajuroza klozilo. La moblaro esas tre simpla, un mala stulo, un mala lito ed un tre kripligita tableto. En parieto esas herdo di qua fairo esas acendita, ma ta fairo esas pikturo sur la parieto. An la fairo esas marmito, olqua anke esas pikturo. Vaporo-nubo, qua aspektis esar reala, likis ek la bolianta kontenajo di la marmito.

Kande Jepeto retroiris aden lua hemo, lu prenis lua ligno-taliili e nemediate lu kreeskis la pupeo.

-Quale me nomizos olu? -lu questionis a su-. Lua nomo esos Pinochio. Ta nomo adportos fortuno ad olu. Me konocis familio di qua nomo esas Pinochio : Pinochio la patro, Pinochio la matro, e Pinochio la pueri... ed omni esis tre felica. La maxim richa ek li mendikis almono.

Ja selektita nomo por la pupeo, Jepeto haste taliis la hararo, la fronto e pose la okuli.

Jus taliita la okuli, vi imaginez la enorma surprizo de Jepeto kande lu konstatis ke ta okuli movis su ed atenceme observis lu.

Ta observado da la okuli a Jepeto kelke jenis lu, do lu dicis ad oli :

-Okuleti ek ligno, pro quo vi observas me ?

Nulu respondis.

Lore Jepeto taliis la nazo, ma jus olu taliesis, jus olu kreskeskis, e pos poka minuti olu esis enorme longa. La povra Jepeto fatigeskis nam jus lu sekis la nazo, jus la impertinenta nazo itere kreskeskis. Pos taliar la nazo, lu taliis la boko. Jus taliita la boko, jus olu rideskis e mokeskis Jepeto.

-Ne plus ridez ! -dicis Jepeto kelke iracigita, ma imperar ulo a la pupeo esis quale imperar ulo a parieto.

-Me itere dicas a vu ke vu ne plus ridez ! -lu klamis per minacanta voco-.

Lore la boko tacis, ma ek olu aparis la tota lango. Jepeto simulis ne vidir ta burlema lango e lu duris la laboro. Pos taliar la boko, Jepeto taliis la mentono, la kolo, la shultri, la ventro, la brakii e la manui.

Jus Jepeto taliis la manui lu konstatis ke ulo senperukigis lu. Jepeto levis lua kapo e, quon lu vidis ? Lua flava peruko sizita da la manui di la pupeo.

-Pinochio... retrodonez la peruko a me !

Vice retrodonar la peruko a Jepeto, Pinochio metis la peruko sur sua kapo, e preske sufokis su. La insolenteso e burlemeso da Pinochio tre multe tristigis Jepeto, qua dicis a la pupeo :

-Raskala filio ! Vu esas mikreita e vu ja esas nerespektema a vua patro ! To esas malajo !

E lu vishis survanga lakrimo.

Kande Jepeto fine taliis la gambi e la pedi, lore Pinochio pedo-frapis la extremajo di la nazo di Jepeto.

-Ton me meritas ! -lu dicis a su-. Me devis pensar pri to antee. Nun to ja esas neevitebla !

Lu prenis Pinochio e pozis la pupeo sur la sulo por marchigar olu. La gambi di Pinochio ne esas habila ed oli ne savis quale marchar, ma Jepeto, sen desprenar la pupeo, docis Pinochio pri quale avancigar unesme pedo e duesme la altra pedo. Balde Pinochio lernis marchar tote sola, sen la helpo da Jepeto, e pluse Pinochio kureskis e salteskis trairante la chambro til ke lu trovis la pordo ed eskapis a la strado.

La desfelica Jepeto persequis la pupeo, ma lu ne sucesis atingar olu pro ke la kerla pupeo saltis sencese same kam leporo, frapante la petrizita sulo per sua ligno-pedi e bruisizante plu multe kam duadek vilajani per lia ligno-shui.

-Sizez la pupeo ! Sizez la pupeo ! -klamis sencese Jepeto-, ma la vilajani qui esis sur la stradi vice sizar la pupeo laute ridis pro observar la fola kurado di la pupeo.

Policano audis la bruiso e lu supozis ke la autoro esis kabranta kavaleto. Brave lu stacis meze la strado, kun lua gambi kelke separita, intence haltigar la kavaleto e do evitar plusa posibla domajuri.

Pinochio vidis de fora disto la policano, e la kuranta pupeo intencis pasar inter ilua gambi, ma la policano sucesis sizar la nazo di Pinochio (ta nazo esis enorme longa) e fine lu donis la pupeo a Jepeto.

Kom puniso, Jepeto intencis tensar la oreli di Pinochio, ma vi omna facile povas supozar la surprizo-grimaco kande lu ne trovis oli ! ma, pro quo ? Evidente pro ke Jepeto obliviis taliar oli !

Do Jepeto prenis la pupeo de la nuko por marchar kune a lua hemo.

-Ni irez a nia hemo ! -dicis iracigita Jepeto-. Che ni, me dicos ulo a vu...

Pinochio, qua timis punisema vorti da Jepeto, intence falis adsur la sulo e ne plus intencis marchar. Lore plura vilajani iris a la jacanta pupeo e cirkondis olu e Jepeto. Ek la tumultanta vilajani, uli dicis :

-Kompatinda pupeo ! Kompreneble olu ne deziras retroirar adheme nam supozeble la bruta Jepeto violente batos olu !

Altri dicis :

-Jepeto semblas esar bona persono, ma lu esas vera tirano a la pueri ! Forsan lu intencas despecigar la pupeo en lua hemo !

Nu ! pro la sencesa parolado kontre Jepeto, la policano liberigis Pinochio ed arestis la povra Jepeto. Dum la marchado a la karcero, la povra Jepeto ploradis same kam bovyuno e kun balbutanta voco lu dicis :

-Negratitudema filio ! E me tre multe laboris por krear lu ! Me devis pensar pri to antee !

To quo eventis, pos la enkarcerigo de Jepeto, esas nekredeblajo, do me naracos olu a vi en la sequanta chapitri.