Plataforma de Integración
Cultural IntégraT
Bloque Nacionalista Galego (BNG) II.1.7.
Inmigración:
As sucesivas reformas da lexislación
sobre inmigración supuxeron un constante recorte nos dereitos
dos estranxeiros residentes no Estado español, que desde
o BNG non compartimos por considerarmos que o fenómeno migratorio
non debe abordarse desde unha perspectiva estritamente policial,
senón apostando por un marco de integración social
e a asunción positiva da pluralidade, e pola dignificación
do estatuto xurídico dos estranxeiros residentes no Estado
español a fin de evitarmos a explotación laboral dos
inmigrantes e erradicar xermolos de xenofobia:
- Aprobación dun novo marco xurídico guiado pola
necesidade de afortalar a seguranza xurídica en materia
de inmigración, que reduza a marxe de discrecionalidade
da Administración e a indefensión que iso provoca
nos estranxeiros residentes, ademais de facilitar a regularización
dos imigrantes residentes no Estado español e evitar o
incremento de persoas en situación irregular que serve
de caldo de cultivo para a explotación e marxinalidade.
- Recoñecemento dos dereitos e liberdades fundamentais
a todas as persoas residentes (entre outros: reunión, asociación,
sindicación, folga), así como os dereitos económicos
e sociais plasmados na Constitución (educación,
asistencia sanitaria, protección social, acceso á
vivenda, etc).
- Garantir o dereito de asilo, acometendo as reformas legais necesarias
para que as solicitudes presentadas sexan atendidas e resolvidas
conforme ao dereito internacional, por medio de procedementos
específicos diferenciados.
- Garantir o dereito á integración lingüística
e cultural das persoas inmigrantes, desenvolvendo os programas
precisos de asesoramento e formación na lingua e cultura
de Galiza.
- Eliminar as restricións ao dereito á tutela xudicial
efectiva dos inmigrantes, con independencia da súa situación
administrativa, ampliando os mecanismos de asistencia xurídica
gratuíta e o dereito á defensa en todos os procedementos.
- Favorecer as condicións para o reagrupamento familiar,
contemplándoo como un dereito do familiar e incorporando
criterios humanitarios para autorizar a residencia de familiares.
- Aplicar de boa fe o vixente Tratado de Paz e Amizade asinado
en 1870 polo Estado español coa República Oriental
do Uruguai.
- Cumprir os Tratados Internacionais ratificados polo Estado español
para a protección dos menores estranxeiros, sexa cal for
a súa situación administrativa.
- Asinar e ratificar a Convención Internacional para a
protección dos dereitos de todas as persoas traballadoras
migratorias e dos seus familiares, aprobada pola Asemblea Xeral
das Nacións Unidas o 18 de decembro de 1990.
- Intensificar a cooperación activa cos países en
situación de crise económica e social, a través
da ampliación das partidas destinadas ao Fondos para a
Axuda ao Desenvolvemento, e o estabelecemento de relacións
económicas e comerciais xustas que permitan o progreso
económico e a creación de condicións favorábeis
para que a súa poboación poida emprender unha vida
digna na súa propia terra
|
